Beynəlxalq Böhran Qrupundan xəbərdarlıq

Azərbaycan və Ermənistan qoşunlarının təmas xəttindəki gərginləşmə son illərdə görünməmiş səviyyəyə çatıb

Yanvar ayında Azərbaycan və Ermənistan qoşunlarının təmas xəttində bir sıra toqquşma halları olub.

Qeydə alınmış toqquşmaların və bəzi rəsmi şəxslərin bəyanatlarının xarakteri son illərdə görünməmiş gərginləşmənin olduğuna işarə edir.

APA-nın məlumatına görə, bu barədə Beynəlxalq Böhran Qrupunun bülletenində bildirilir.

Qeyd olunur ki, yanvarın 20-dən başlamış gərginləşmə nəticəsində münaqişə tərəfləri istər vəzifəli şəxslər, istər də KİV tərəfindən düşmənçilik ritorikasına qayıdıb. Bununla yanaşı, tərəflər bir-birini zorakılıqda ittiham edir.

Təşkilat qeyd edir ki, təmas xəttindəki toqquşmaların detalları hələ də aydın deyil.

Beynəlxalq Böhran Qrupu xatırladır ki, bu məsələ yanvarın 24-də Parisdə Azərbaycan və Ermənistan xarici işlər nazirlərinin və ATƏT-in Minsk qrupu həmsədrlərinin görüşündə müzakirə olunub. Həmin görüşdə vasitəçilər öz narahatlığını ifadə edib və tərəfləri hərbi əməliyyatlara son qoymağı çağırıb.