Yol qəzası: 1 nəfər ölüb, 5 nəfər xəsarət alıb

Bakı-Şamaxı-Yevlax avtomobil yolunda bir nəfərin ölümü, 5 nəfərin xəsarət alması ilə nəticələnən avtomobil qəzası baş verib. APA TV-nin məlumatına görə, hadisə yolun 195-ci kilometrliyində, Göyçayın Qaraməryəm kəndi ərazisində qeydə alınıb. Göyçay şəhər sakini 38 yaşlı Ayaz Ağarəhimovun idarə etdiyi “VAZ 21011” markalı minik maşını, qarşı tərəfdən gələn 48 yaşlı Əbülfət Allahverdiyevin idarə etdiyi “Mitsubishi Pajero” markalı minik maşını ilə toqquşub. Hadisə nəticəsində sürücü Ayaz Ağarəhimov, onun həyat yoldaşı 33 yaşlı Günel Ağarəhimova, övladları 10 yaşlı Zərəngül Ağarəhimova və 9 yaşlı Fidan Ağarəhimova, həmçinin “Mitsubishi Pajero”nun sürücüsü Əbülfət Allahverdiyev müxtəlif dərəcəli bədən xəsarətləri ilə Göyçay Mərkəzi rayon Xəstəxanasına yerləşdirilib. Ailənin 6 aylıq körpəsi Məhəmməd Ağarəhimov aldığı xəsarətlər səbəbindən hadisə yerində ölüb.

Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.