Sarkisyan tanınmamış “respublikalarla” sazişlər haqqında qanunu imzalayıb

APA-nın məlumatına görə, yeni dəyişikliklərə əsasən, Ermənistan tanınmamış “respublikalarla” müqavilələr imzalaya biləcək.

Xatırladaq ki, Ermənistan parlamenti dekabrın 17-də “Beynəlxalq müqavilələr haqqında” qanuna dəyişikliklər layihəsini son oxunuşda qəbul edib. Bu dəyişikliklər beynəlxalq hüquq tərəfindən tanınmamış subyektlərlə sülhün təminatı, insan haqlarının müdafiəsi, humanitar, iqtisadi və maliyyə yardımı məsələlərini nizamlamağı nəzərdə tutur.

Ermənistan xarici işlər nazirinin müavini Şavarş Koçaryan bildirib ki, qanun layihəsinə əsasən, beynəlxalq müqavilənin tərəfdarı rolunda beynəlxalq hüquq tərəfindən tanınmamış subyektlər çıxış edə bilər. Bununla da Ermənistan separatçı “Dağlıq Qarabağ Respublikası” ilə saziş və müqavilələri parlamentdə ratifikasiya etmək niyyətindədir. Koçaryan bildirib ki, Ermənistan “DQR”in təhlüksəziliyinin qarantı rolunda çıxış edir və ikitərəfli müqavilələrin imzalanması prosesinin davam etməsi bunu isbatlayır: “Qarabağın müstəqilliyinin tanınması gündəlikdədir və bu daha əlverişli zamanda, maksimak effekt əldə etmək mümkün olanda həyata keçiriləcək”.