Dəniz quldurları 1 gəmini də ələ keçirdilər

Bu gün Somali dəniz quldurları Ədən körfəzində, Oman sahil suları yaxınlığında Almaniyanın “Grona Tankers” şirkətinə məxsus “Ems River” yük gəmisini ələ keçiriblər. Lent.az-ın “Rosbalt” agentliyinə istinadən verdiyi məlumata görə, gəmi Birləşmiş Ərəb Əmirliklərindən Yunanıstana gəlirmiş.

Gəminin göyərtəsində 8 heyət üzvü var. Onların 1-i Rumıniya, digərlər Filippin vətəndaşlarıdır. Hazırda dəniz quldurlarına qarşı Ədən körfəzində mübarizə aparan hərbi missiya hadisələrin inkişafını izləyir.

Qeyd edək ki, bu gün Somali dəniz quldurları bu il mayın 8-də ələ keçirdikləri “Marida Marguerite” tankerini və tankerin heyət üzvlərini 5,5 milyon dollar ödənc qarşılığında sərbəst buraxıblar. Almaniyanın “OMCI Shipmanagement GmbH & Co” şirkətinə məxsus gəminin heyətində 22 nəfər olub. Ancaq almanların sevinci uzun çəkməyib...

Sonuncu gəmi ilə dəniz quldurlarının bu il ələ keçirdikləri gəmilərin sayı 51-ə çatıb.