Avropa donur

Avropa soyuq və qarın əsirinə çevrilib.

Lent.az-ın İTAR-TASS agentliyinə istinadən verdiyi məlumata görə, dekabrın 20-dən 21-ə keçən gecə mənfi 17 dərəcə temperatur qeydə alınıb, İrlandiyanın buzlu yollarında xaos yaşanıb.

Yolları təmizləmək üçün artıq reaktivlər çatışmır. Hökumət əhalini qarın təmizlənməsinə kömək etməyə çağırıb. Dublin aeroportu da fəaliyyətini dayandırıb.

Paris küçələrində də bu günlərdə insanları nadir hallarda görmək olar. Yollar buz bağladığı üçün hərəkət etmək çətinləşib. Paris və Paris ətrafındakı qəsəbələrdə avtobus reysləri bir neçə günlük ləğv olunub. Almaniya, Belçika və Lüksemburqda da yollar qismən, ya da tamamilə bağlanıb. Yeni il ərəfəsində bu yollar turistlər üçün lazımdır.

Frnakfurt-Mayna qəfil güclü qar yağması Avropanın böyük aeroportlardan birinin bağlanmasına səbəb olub. Təyyarə reysləri ləğv edilib. Aeroportun bütün işçiləri eniş-uçuş zolaqlarını təmizləmək üçün səfərbər olunublar.

Böyük Britaniyada da anomal havalar davam edir. Ölkənin şimal və şərq regionlarında şaxtalı və qarlı hava üstünlük təşkil edir. “British Airlines” təyyarə reyslərinin yarısını ləğv edib. Ölkədə bir çox avtomobil yolları bağlanıb. Yol xidməti işçiləri qarı təmizləmək iqtidarında deyillər.