Yeni cəhənnəm istisi XƏBƏRDARLIĞI – Kölgədə 45 dərəcə

Yayın sonunda Avropa ölkələrini yeni bir cəhənnəm istisi dalğası bürüyəcək. Bəzi yerlərdə kölgədə temperatur 45 dərəcə Selsiyə çatacaq.

Lent.az-ın xarici mediaya istinadən xəbərinə görə, sinoptiklər xəbərdarlıq ediblər ki, isti hava sentyabr ayına qədər davam edəcək. Avropalı sinoptiklərin proqnozlara görə, yaxın günlərdə yüksək təzyiq sahəsi şimaldan qitənin mərkəzindən cənubuna doğru genişlənəcək və burada hazırkı istilik günbəzinin mərkəzi yerləşəcək.

Bundan əlavə, böyük bir Atlantik siklonu cənubdan havanı bu bölgəyə çəkəcək və bu da xüsusilə avqustun 31-nə qədər daha da istiləşməyə səbəb olacaq.

Qeyd olunur ki, İtaliya kəskin istiləşmənin bariz nümunəsidir. Məsələn, Kapo-San-Lorenzoda son 24 saat ərzində temperatur 40,2°C-yə, Kataniyada isə 40°C-yə çatıb. Bunlar hazırda Avropanın ən isti bölgələridir, lakin temperaturun artması yaxın günlərdə digər ölkələrə də yayılacaq.

Xüsusilə, Cənubi Avropada, xüsusən də İtaliyanın şərqində, mərkəzi və cənubunda; Yunanıstan da daxil olmaqla Balkanlarda; və İberiya yarımadasında; eləcə də İspaniyanın şərqində və cənubunda və Portuqaliyanın cənub-şərqində yaxın günlərdə istilər daha da güclənəcək. Bu bölgələrdə temperatur kölgədə 30-45°C-yə çatacaq.

Qeyd edilir ki, günəşdə, eləcə də şəhərlərdə faktiki temperatur 10-20°C-yə qədər xeyli yüksək olacaq, ona görə də qitədə sözün əsl mənasında cəhənnəm istiliyi hələlik azalmayacaq.