Günəş aktivliyi zəlzələlərə necə təsir edə bilər?

Tsukuba Universiteti və Yaponiyanın Qabaqcıl sənaye elmləri və texnologiyaları milli institutundan bir qrup alim günəş aktivliyinin zəlzələlərə mümkün təsirini müəyyən edib.

Lent.az xarici mediaya istinadla bildirir ki, onların məlumatlarına görə, Yer səthinin temperaturunda günəş tsiklləri nəticəsində yaranan dəyişikliklər tektonik plitələrə təzyiqi dəyişə bilər, seysmik hadisələrin baş vermə ehtimalını artırır.

Günəş necə zəlzələlərə səbəb ola bilər?

Alimlər zəlzələlər, Yerin temperaturu və günəş aktivliyi ilə bağlı məlumatları müqayisə etmək üçün riyazi modellərdən və kompüter analizindən istifadə ediblər. Belə çıxır ki, proqnozlaşdırma modellərinə temperatur məlumatlarının daxil edilməsi, xüsusilə dayaz zəlzələlər üçün onların dəqiqliyini artırır.

Əsas mexanizm, tədqiqatçıların fikrincə, temperaturun dəyişməsinin süxurların xüsusiyyətlərinə təsir etməsi ilə bağlıdır. Artan günəş aktivliyi süxurları daha kövrək və çatlamağa meyilli edə bilər ki, bu da öz növbəsində yeraltı su axınlarına və tektonik plitələrin sərhədlərində təzyiqə təsir göstərir.

Bu, zəlzələləri proqnozlaşdırmağa necə kömək edəcək?

Günəş aktivliyinin seysmik aktivliyə təsirinin az olduğu aşkar edilsə də, alimlər hesab edirlər ki, günəş dövrlərinin nəzərə alınması mövcud zəlzələlərin proqnozlaşdırılması üsullarını təkmilləşdirə bilər. Temperatur dəyişikliyi məlumatlarının daxil edilməsi dayaz seysmik hadisələrin daha dəqiq proqnozlaşdırılmasına imkan verəcək ki, bu da daha effektiv xəbərdarlıq sistemlərinin inkişafına kömək edə bilər.

Bu kəşf kosmik və geofiziki proseslər arasında mürəkkəb əlaqəni vurğulayır və zəlzələ elminin inkişafında mühüm addım ola bilər.