Macarıstandakı səfirliyimizdə Dünya Azərbaycanlılarının Həmrəylik Günü və Yeni il bayramı qeyd olunub

Səfirliyin mətbuat xidmətindən Lent.az-a verilən məlumata görə, tədbirdə səfirlik əməkdaşları, Macar-Azərbaycan dostluq cəmiyyətinin üzvləri, Budapeştin ali məktəblərində təhsil alan azərbaycanlı tələbələr, macar ictimaiyyətinin və media qurumlarının nümayəndələri iştirak ediblər.

Tədbiri giriş sözü ilə açan səfir Vilayət Quliyev son illərdə dünyanın bir çox ölkələrində Azərbaycan diasporunun fəaliyyətində bir canlılıq yarandığını, bunun da ilk növbədə respublikamızda həyata keçirilən məqsədyönlü siyasət, eyni zamanda coşqun tərəqqi və inkişafla bağlı olduğunu bildirib. Səfir Azərbaycan həqiqətlərinin dünya miqyasında yayılması baxımından xarici ölkələrdə yaşayan həmvətənlərimizin planlı fəaliyyətinin əhəmiyyətini xüsusi vurğulayıb. Vilayəti Quliyev həmvətənlərimizin hər birini “Azərbaycan mənə nə verib?” prinsipi ilə deyil, “Mən Azərbaycana nə verə bilərəm?” prinsipi ilə hərəkət etməyə çağırıb.

Macar-Azərbaycan Dostluq cəmiyyətinin sədri Svetlana Abdullayeva son bir il ərzində Diasporla İş üzrə Dövlət Komitəsi. və Azərbaycanın Macarıstandakı səfirliyinin dəstəyi ilə həyata keçirilən layihələrdən söz açıb, Macarıstanda Azərbaycana, onun qədim tarixinə və təkrarsız mədəniyyətinə marağın durmadan artdığını söyləyib. Daha sonra azərbaycanlı tələbələrin nümayəndələri çıxış edərək macar gəncləri ilə yaratdıqları əlaqələrdən danışıblar. Tədbir ziyafət və özfəaliyyət konserti ilə davam etdirilib.