Apreldə toyu olacaq azərbaycanlı jurnalistin ölümünün TƏFƏRRÜATI

Azərbaycanlı jurnalist Ülviyyə Şamilqızının Rusiyanın Həştərxan vilayətində avtomobil qəzası nəticəsində ölməsinin bəzi təfərrüatı məlum olub.

Lent.az-ın Rusiya Daxili İşlər Nazirliyinin Həştərxan Vilayəti üzrə Polis İdarəsinin saytına istinadən xəbərinə görə, hadisə dünən saat 18.20-də Trusovsk rayonunda, Tambov-Volqoqrad-Həştərxan avtomobil yolunun 1378-ci kilometrliyində, tənzimlənməyən piyada keçidində baş verib.

30 yaşlı sürücünün idarə etdiyi "Volkswagen Passat" markalı avtomobil məşqdən evə dönən qadını vurub. Həlak olan qadının Həştərxan universitetlərindən birində təhsil alan Azərbaycan vətəndaşı olduğu məlum olub. O, hadisə yerində vəfat edib.

Baş verən hadisə ilə bağlı Rusiya Daxili İşlər Nazirliyinin Həştərxan vilayəti üçün İstintaq İdarəsində prosessual yoxlama aparılır.

***

12:01

Rusiyada yol qəzasında həlak olan azərbaycanlı jurnalist Ülviyyə Şamilqızının atası Şamil Məmmədov Qarabağ müharibəsində itkin düşüb. Yaxınlarının Lent.az-a verdiyi məlumata görə, sonradan ona şəhid statusu verilib.

Faciənin qurbanı olan jurnalist xanım bu ilin aprelin ayında evlənməyə hazırlaşırmış.

***

11:02

Azərbaycanlı jurnalist Ülviyyə Şamilqızını (Məmmədova) Rusiyanın Həştərxan şəhərində avtomobil vuraraq öldürüb. Lent.az xəbər verir ki, yaxınlarının “Report”a verdiyi məlumata görə, mərhumun meyiti hazırda tibbi-ekspertiza məntəqəsindədir. Ü.Şamilqızının cənazəsi doğulduğu Gəncə şəhərinə aparılaraq orada dəfn olunacaq.

Qeyd edək ki, uzun müddət Azərbaycan mətbuatında fəaliyyət göstərmiş Ülviyyə Şamilqızı bir sıra KİV-lərdə, o cümlədən “Xalq Cəbhəsi” qəzetində, “Report” İnformasiya Agentliyində çalışıb. O, fəaliyyəti dövründə dəfələrlə jurnalistlər arasında keçirilən müsabiqələrin qalibi və mükafatçısı olub. Ü.Şamilqızı təhsilini davam etdirmək üçün ötən ildən Rusiyanın Həştərxan şəhərində yaşayırdı.

Allah rəhmət eləsin!