Kütləvi davaya görə tutulanların sayı 10-a çatdı

Bakıda baş vermiş kütləvi davada iştirak etmiş daha 2 nəfər tutulub. Lent.az-ın məlumatına görə, Nəsimi RPİ 21-ci PB əməkdaşlarının keçirdikləri əməliyyat-axtarış tədbirləri nəticəsində yanvarın 27-də Amid Ağalarova və Elnur Cəfərova bıçaqla xəsarət yetirmiş qrupun digər üzvləri - Bakı şəhər sakinləri, əvvəllər məhkum olunmuşlar Gündüz Məmmədov və Ramil Əliyev tutulublar. G.Məmmədovdan 3,34 qram həşiş, R.Əliyevdən isə lüləsi və qundağı kəsilmiş ov tüfəngi və 2 ədəd patron götürülüb.

Qeyd edək ki, Nəsimi rayon Polis İdarəsi Cinayət Axtarış Şöbəsi əməkdaşlarının keçirdiyi əməliyyat tədbirləri nəticəsində Masallı rayon sakini Əfləddin Muradovdan 1 qramdan artıq həşiş götürülüb. Araşdırma zamanı müəyyən edilib ki, o, Bakı şəhər sakini Mirzə Niftullayevlə birlikdə yanvarın 2-də Bakıxanov küçəsində Şabran rayon sakini Amid Ağalarova və Bakı şəhər sakini Elnur Cəfərov bıçaq xəsarəti yetirib. Bundan başqa məlum olub ki, A.Ağalarov, E.Cəfərov, Nail Hacıyev, Zaur, Qara və Namiq adlı şəxslər yanvarın 2-i saat 06:30 radələrində, R.Behbudov küçəsində xuliqanlıq zəminində Bakı şəhər sakinləri Azad Sultanovu və həmin gün saat 07:15 radələrində, R.Behbudov küçəsində Səbuhi Mehrəliyevi döyüblər. Hadisədən sonra S.Mehrəliyev və A.Sultanov Naxçıvan şəhər sakini Emil Zeynalovun idarə etdiyi «Kia» markalı avtomobillə Şamxal, Zamiq adlı şəxslə birlikdə hadisə yerindən uzaqlaşarkən, saat 07:25 radələrində Bakıxanov küçəsində həmin şəxslər arasında təkrarən münaqişə baş verib. Hadisə zamanı M.Niftullayev və Ə.Muradov A.Ağalarova və E.Cəfərova bıçaq xəsarətləri yetiriblər. Nəsimi RPİ 21-ci PB əməkdaşlarının keçirdiyi əməliyyat tədbirləri nəticəsində Ağdaş rayon sakini Nail Hacıyev tutulub və ondan 2 qramdan artıq həşiş götürülüb. Təxirəsalınmaz əməliyyat tədbirləri nəticəsində cinayətdə şübhəli bilinən Amid Ağalarova, Elnur Cəfərova xəsarət yetirən Mirzə Niftullayev, Naxçıvan şəhər sakini Emil Zeynalov, Bakı şəhər sakini Zamiq Quliyev, Bərdə rayon sakini Şamxal Həsənov, İmişli rayon sakini Emin Qasımzadə də tutulub.