Ermənistanda “Yeni Hələb” salınır

Ermənistanın Aştarak şəhərində suriyalı erməni qaçqınları üçün “Yeni Hələb” adlı məhəllə inşa ediləcək. Lent.az-ın “bbc”-yə istinadən məlumatına görə, bu barədə Ermənistanın diaspor naziri Hranuş Hakobyan məlumat verib. Məlumata əsasən Ermənistan hökuməti Aştarak şəhəri ərazisində 600 ailə üçün nəzərdə tutulan məhəllənin inşası üçün suriyalı ermənilərin problemləri ilə məşğul olan Koordinasiya Mərkəzinə 4,8 hektar sahə ayırmaq haqqında qərar qəbul edib.

Nazir Hakobyan tikintinin dövlət tərəfindən ayrılan və xeyriyyəçilərin vəsaitləri hesabına aparılacağını qeyd edib: “600 ailə həmin məhəllədə mənzil almaq və onların dəyərinin 50 faizini ödəməyə hazırdı”.

Onun sözlərinə görə, hal hazırda daimi yaşamaq üçün Ermənistana təqribən 7 min suriyalı erməni köçüb. Suriyanın erməni icması ən güclü diaspor qurumlarından biri hesab edilir və son zamanlaradək sayı 100 minə çatırdı.

Qeyd edək ki, Suriyada hakimiyyətlə müxalifət arasında hərbi qarşıdurma 2011-ci ilin mart ayında başlanıb. BMT-nin məlumatına görə, bu müddət ərzində ölkədə təxminən 80 min adam həlak olub.