Məşhur aktyor Ömər Şərif: “Hüsnü Mübarək istefa verməlidir”

Dünya şöhrətli kinoaktyor, Hollivud ulduzu Ömər Şərif Misir xalqı ilə həmrəylik nümayiş etdirib. Lent.az-ın “France Inter” radiostansiyasına istinadən verdiyi məlumata görə, Ömər Şərif hesab edir ki, Misir prezidenti Hüsnü Mübarək istefa verməlidir.

Hazırda Qahirədə bir mehmanxanada olan aktyor bildirib ki, Hüsnü Mübarək 30 il ərzində ölkəyə rəhbərlik edib: “Prezident misirlilərin həyatını yaxşılaşdırmayıb. Əhalinin 1 faizi həddən artıq varlıdır, 99 faiz isə yemək dərdi çəkir”.

Ömər Şərif hakimiyyətin on illər ərzində əzməyə çalışdığı müxalif Müsəlman Qardaşları Hərəkatının bu gün önə çıxmasından da narahatdır: “Müsəlman Qardaşları Hərəkatını da dəstəkləmirəm. Bu gün ölkə əhalisinin 20 faizi onlara dəstək verir və bu, məni qorxudur”.

Hüsnü Mübarəkə mənfi münasibət bəsləyən Ömər Şərif onun vitse-prezident təyinatından isə sevinib: “Ömər Süleymanın vitse-prezident təyin edilməsi yaxşı haldır. Ömər Süleymanın İsraillə də yaxşı münasibətlərə malikdir”.