İsrailin “Mavi Mərmərə” hesabatını bazar günü açıqlayacaq

İsrailin iki hissədən ibarət olan “Mavi Mərmərə” hesabatının ilk hissəsinin bazar günü açıqlanacağı bildirilib. Lent.az-ın “trt.net.tr” satının Azərbaycan versiyasına istinadən verdiyi məlumata görə, Qüdsdə İzak Rabin Qonaq Evində keçiriləcək mətbuat konfransından öncə hesabatın ilk hissəsi İsrailin baş naziri Benyamin Netanyahuya veriləcək.

Komissiya sənədi iki hissə şəklində təqdim edəcək. İlk hissədə İsrail Nazirlər Kabinetinin 14 iyun 2010-cu ildə komissiya yaradılması ilə bağlı qərarı çərçivəsində Qəzzanın dənizdən mühasirəyə alınmasının zəruriliyindən və bu arqumentlərin beynəlxalq hüquqa uyğunluğundan bəhs ediləcək. Sənədin ikinci hissəsinin nə zaman yayımlanacağı isə bəlli deyil.

İsrailin “Kanal 2” televiziyası və ordu radiosunun komissiyaya yaxın mənbələrə istinadən verdiyi xəbərdə bildirilir ki, sənəddə İsrail ordusunun əməliyyat zamanı beynəlxalq hüquq normalarına uyğun davrandığı vurğulanacaq. Ancaq xəbərdə sənəddəki əsasların beynəlxalq birlik tərəfindən inandırıcı sayılmasının şübhə doğurduğu bildirilib.