Tehran Ümumdünya İslam Sammitini boykot edir

İran islam dövlətlərinin parlament rəhbərlərinin yanvarın 18-də Əbu-Dabidə başlayan sammitinə qatılmayacağını bəyan edib.

Lent.az-ın “mignews.com” saytına istinadən verdiyi məlumata görə, Birləşmiş Ərəb Əmirliklərinin təşəbbüsü ilə sammitdə islam dövlətləri arasında yaranan mübahisələri həll etmək üçün parlamentlərarası xüsusi komitənin yaradılması, eyni zamanda Sudandakı referendum və müsəlman dövlətlərində xristian azlıqların qorunması məsələsi müzakirə olunacaq.

İran parlamentinin müdafiə və xarici siyasət komitəsinin üzvü Kazem Calali deyib ki, Tehran qeyri-leqal forumda iştirak etməyəcək. İranı qəzəbləndirən islam dövlətləri arasında yaranan mübahisələri həll etmək üçün parlamentlərarası xüsusi komitənin yaradılması məsələsinin müzakirəyə çıxarılmasıdır. Müsəlman dövlətləri arasında hazırda 200-ə qədər mübahisəli məsələ var. İran özü də 1971-ci ildə o vaxta qədər Birləşmiş Ərəb Əmirliklərinə məxsus olmuş Abu Mussa və Tunbs adalarını işğal edib. Kazem Calali iddia edib ki, bu sammitdə qəbul olуnacaq qərarlar islam birliyinə yönələcək və yerinə yetirilməyəcək: “Təəssüf ki, bəzi ərəb dövlətləri marginal və kiçik əhəmiyyət daşıyan problemlərlə bağlı planı gündəliyə gətirmək istəyir. Biz bu plana ABŞ, Böyük Britaniya və İsrailin yaramaz, cinayətkar düşüncəsi kimi baxırıq”.

Sammitdə Birləşmiş Ərəb Əmirliklərinin nümayəndə heyətinə rəhbərlik edən Yusey əl-Neyami isə bəyan edib ki, İranın qərarından və bəyanatlarından məyusdurlar və qəzəbləniblər. Onun sözlərinə görə, bu komitə müsəlmanların problemlərini xarici müdaxilə olmadan həll etməyi bacarmaları üçün yaradılır: “Bu komitə Abu Mussa və Tunbs adalarının qanuni sahibinə qaytarmaq üçün yaradılmır”.