Livanda ara qarışır

Bu gecə Livanda Azad Vətənpərvərlər Hərəkatı Xristian Partiyasının qərargahına iki qumbara atılıb. Lent.az-ın “mignews.com” saytına istinadən verdiyi məlumata görə, sabiq baş nazir Mişel Aunun rəhbərlik etdiyi bu partiya az əvvəl hökumət koalisiyasından çəkilən və bununla da siyasi böhrana yol asan “Hizbullah” Hərəkatı ilə müttəfiqdir.

Paytaxt Beyrut yaxınlığındakı Beyt-Şabab qəsəbəsində yerləşən partiyanın qərargahında baş verən partlayış zamanı xəsarət almayıb.

Qeyd edək ki, Livanda hökumət böhranı Livanın sabiq baş naziri Rafik Həririnin öldürülməsi ilə bağlı BMT Tribunalı tərəfindən aparılan araşdırma ilə bağlı yaranıb. Rafik Hərinin oğlu, Livanın hazırkı baş naziri Saad əl-Həriri hökumətin buraxılması ilə bağlı prezidentə müraciət edib və müraciət qəbul olunub. Yeni hökumət qurulan qədər Saad Həriri hökuməti fəaliyyətini davam etdirməlidir. Ancaq “Hizbullah”ın hökumət koalisiyasından çıxması ölkədə müharibə təhlükəsini artırıb.

Bu gecə axşam saatlarında Saaad Həririnin Türkiyəyə gəldiyi məlum olub. Gecə saat 01:20-də hava limanına enən Livan baş nazirini Türkiyənin dövlət naziri Cövdət Yılmaz qarşılayıb. Saad Həriri bu gün baş nazir Rəcəb Tayyib Ərdoğanla görüşəcək. Görüşdə xarici işlər naziri Əhməd Davudoğlu da iştirak edəcək. Türkiyə Saad Həririnin mövqeyini öyrənəcək və Livandakı böhranın aradan qaldırılması istiqamətində atıla biləcək addımları müəyyənləşdirəcək.

Bu arada Livanda “Hizbullah”a yaxın saytlar Saad Həririnin qorxudan ölkəni tərk etdiyi və geri qayıtmayacağı barədə məlumatlar yayıb.