“Dokor Frankenşteyn” yaxalandı

İnterpol tərəfindən axtarılan və insan orqanlarının qanunsuz transplantasiyası ilə məşğul olan beynəlxalq cinayətkar şəbəkənin Türkiyədəki əsas nümayəndəsi olmaqda təqsirləndirilən “Doktor Frankenşteyn” ləqəbli professor Yusuf Erçin Sönmez İstanbulda bir villada yaxalanıb.

Lent.az-ın Türkiyənin “Vatan” qəzetinə istinadən verdiyi məlumata görə, Yusuf Erçin Sönmez ilk ifadəsində İstanbuldakı ailəsi üçün darıxdığını və onları görmək üçün Kosovadan Türkiyəyə gəldiyini söyləyib.

Qeyd edək ki, Türkiyədə qeyri-qanuni orqan köçürməsi ilə məşğul olduğu üçün “Doktor Frankenşteyn” kimi məşhurlaşan Yusuf Erçin Sönmez Kosovada qeyri-qanuni şəkildə orqan transplantasiyası həyata keçirdiyi və insanlardan pulla aldığı orqanları daha böyük məbləğdə pul müqabilində xarici ölkələrə satdığı üçün İnterpol tərəfindən axtarılır.

İstanbul Məhkəməsi Yusuf Erçin Sönmezin Kosovaya ekstradisiya edilib-edilməyəcəyi barədə qərar verəcək.