Yunan memarların tikdiyi İstanbul –

Rəsmi olaraq “mədəniyyət paytaxtı” ili başa çatsa da, şəhərdə hələ də bu mövzuda tədbirlər keçirilir, şəhərin hər yerində afişalara rast gəlmək mümkündür. Bu çərçivədə son tədbirlərdən biri də Yunanıstanın istanbuldakı konsulluğunda keçirildi. “Qərbləşən İstanbulun yunan memarları” adlı sərgi çox böyük maraq doğurdu.

Bu sərgi bir daha şovinizm və irqi ayrı-seçkiliyin türk xalqları (bütünlükdə) üçün yad olduğunu göstərdi. Belə ki, yunan memarların əsərləri arasında kilsələrlə yanaşı, müsəlmanlara məxsus dini tikililərə də rast gəlinir. Türkiyə və Yunanıstan arasında əlaqələrdə dəfələrlə böhran yaranmasına baxmayaraq, yunan memarların yaratdığı işlərə heç kəs toxunmayıb. Tarixi istiqlal prospektində bu gün də binaların üzərində yunan və fransız dillərində yazılara rast gəlmək mümkündür. Hətta Taksim meydanından bir qədər aralı məhəllədə kilsə və məscid eyni həyətdə yerləşir. Yerli sakinlərin sözlərinə görə, məscid ötən əsrin ortalarında qəza vəziyyətinə düşərkən onun bərpasında müsəlmanlarla yanaşı, xristianlar da iştirak edib. Burada ayrı-ayrı din daşıyıcıların bir-birinə sağlam münasibəti bütün dünya üçün örnək ola bilər.

Lent.az sizə “Qərbləşən İstanbulun yunan memarları” adlı sərgidən çəkilmiş fotoları təqdim edir.

Vüqar Ələsgərov