Türkiyədə müğənni kürd dilində mahnı oxuya bilmədiyi üçün güllələnib!

Dekabrın 16-da saat 23:00 radələrində Türkiyənin Mersin şəhərində əylənmək üçün “DT Jasmin Türkü” adlı bara gələn Metin Baydar 38 yaşlı müğənni Sarp Öztürkdən kürd dilində mahnı oxumasını istəyib.

Lent.az-ın “Milliyet” qəzetinə istinadən verdiyi məlumata görə, Sarb Öztürk kürd dilində mahnı bilmədiyini söyləyib.

Sifarişinin yerinə yetirilməməsinə qəzəblənən Metin Baydar gecə saat 01:00 radələrinə qədər barda qalıb və müğənniyə, gitaraçı Göktay Okçuya və 21 yaşlı bar xidmətçisi Ramazan Koça söz ataraq sataşmağa başlayıb. Saat 01:00-da bardan çıxan Metin Baydar evdən silahını götürərək yarım saat sonra geri qayıdıb. O, evli və 1 uşaq atası olan Sarp Öztürk, gitaraçı Göktay Okçu və bar xidmətçisi Ramazan Koça atəş açıb.

Qarın boşluğundan 2 güllə yarası alan Sarp Öztürk xəstəxanaya aparılsa da, həkimlər onun həyatını xilas edə bilməyiblər. Ayaqlarından yaralanan Göktay Okçu və Ramazan Koçun həyatları üçün təhlükə yoxdur...