Dünyanın ən ağıllı iti 1022 söz bilir – FOTO

Lent.az-ın “Corriere della Sera” qəzetinə istinadən verdiyi məlumata görə, ABŞ-ın Cənubi Karolina ştatındakı “Kaser” 1022 canlı heyvan və cansız əşyanın adını bilir və onları tanıyır.

Vofford Universitetində çalışan psixoloqlar Alliston Reid və John Pilley 6 yaşlı itə 3 il ərzində hər gün 4-5 saat təlim keçiblər. Hər dəfə “Kaser”ə fərqli bir şey göstərən psixoloqlar it onların adını əzbərləyənə qədər sözləri təkrarlayıblar. Təcrübənin sonunda “Kaser” nəinki həmin şeylərin adlarını öyrənib, eyni zamanda onların şəkillərini və formalarını da qavradığını ortaya qoyub. Bununla da ağıllı it 3 yaşlı uşağın əldə etdiyi nəticəyə bərabər nəticə əldə edib.

838 testdən keçirilən “Kaser”in qarşısında 20 canlı heyvan və cansız əşya arasında adı çəkilənləri tapmaq tapşırığı qoyulub. “Kaser” bu testlər zamanı 2-dən artıq səhv etməyib. Psixoloqlar itin sözləri xatırlama və ayırd etmə qabiliyyətinin olduğunu üzə çıxarıblar.

Bununla da “Kaser” dünyada ən zəngin söz ehtiyatına sahib heyvan olub. Bundan əvvəl bu sahədə rekord 200 kəlməbilən “Border Collie” cinsli “Rico” adlı itə məxsus olub. Arizona Universitetində təlim keçən “Alex” adlı tutuquşu da 100 sözdən istifadə edərək insanla danışa bilib.