BTC ABŞ-ın milli təhlükəsizlik əhəmiyyətli obyektlərinin siyahısına salınıb

Lent.az-ın “trt.net.tr” satının Azərbaycan versiyasına istinadən verdiyi məlumata görə, ABŞ Dövlət Departamenti 2009-cu ilin fevral ayında bütün xarici nümayəndəliklərindən ölkənin milli təhlükəsizliyi baxımından əhəmiyyət daşıyan obyektlərin siyahısını istəyib.

Bu siyahı “Wikileaks” ın ələ keçirdiyi sənədlər arasında olub. Amerikalı diplomatlar qeyd etdikləri obyektlər zərər görəcəyi halda ABŞ mənafelərinin təhlükə altında qalacağını söyləyiblər. Bu sırada yüzlərlə neft obyektləri, boru xətti, dənizaltı kabellər, fabriklər, Konqodakı kobalt mədənindən Avstraliyada zəhər əleyhinə preparatlar istehsal edən fabrikə, Danimarkadakı insulin fabrikinə qədər bir çox yer göstərilir. Siyahıda Bakı-Tiflis-Ceyhan boru xətti, İstanbul Boğazı, o cümlədən Türkiyədə bəzi metaləritmə zavodlarının da adı var.

“Wikileaks”ın indiyə qədər yaydığı ən mübahisəli sənəd olduğu bildirilən bu siyahı təhlükəsizlik mütəxəssisləri tərəfindən “terror təşkilatları üçün hədiyyə paketi” kimi dəyərləndirilir.