Portuqaliyada həyat dayanıb
24 noyabr 2010 15:03 (UTC +04:00)

Portuqaliyada həyat dayanıb

Bu gün Portuqaliyada 24 saatlıq ümummilli tətil başlayıb. Lent.az-ın “Reuters” agentliyinə istinadən verdiyi məlumata görə, banklar, müəssisələr, yanacaqdoldurma məntəqələri, məktəblər bağlanıb, ictimai nəqliyyat işləmir, gün ərzində xəstəxanalarda yalnız təcili xarakterli cərrahi əməliyyatlar aparılacaq.


Ölkənin dəniz və hava limanlarının işi iflic duruma düşüb. Son 22 ildə keçirilən bu ən böyük tətilin təşkilatçıları Portuqaliya Zəhmətkeşlərinin Ümummilli Konfederasiyası və Zəhmətkeşlərin Ümummilli İttifaqıdır. Bu iki həmkarlar təşkilatı bu vaxta qədər bir-birinə qarşı kəskin rəqabət aparsa da, bu dəfə birgə hərəkət edirlər. Baş nazir Joze Sokratiş deyib ki, aksiya təşkilatçıları haqqında cinayət işi açıla bilər.


Qeyd edək ki, bu tətil aksiyası hökumətin iqtisadi siyasətinə etiraz əlaməti olaraq keçirilir. Aksiya iştirakçıları əməkhaqqının azaldılması, vergi güzəştlərinin, sosial ödəmələrin ləğvi ilə bağlı qərarının ləğvini tələb edirlər. Hakimiyyət isə bu addımla böyük büdcə kəsirini azaltmağa ümid bəsləyir. Aksiyanın Portuqaliya iqtisadiyyatına 100 milyon avro ziyan vuracağı proqnozlaşdırılır.


Xatırladaq ki, bu günlərdə Portuqaliya xarici işlər naziri Luiş Amadu deyib ki, əgər hakim partiya və müxalifət koalisiya formalaşdırılması barədə razılığa gəlməzsə, müxalifət sərt iqtisadi siyasəti dəstəkləməzsə, Portuqaliya avro zonasını tərk edə bilər.
# 442

Oxşar yazılar