Rauf Arifoğlu hədələdi: “Biri var, yenə qaşınır...”

“Yeni Müsavat” qəzetinin baş redaktoru Rauf Arifoğlu öz facebook səhifəsində hər kəsi təəccübləndirəcək bir status yazıb. Lent.az-ın məlumatına görə, R. Arifoğlu statusunda ad çəkmədən onlara hücum edənlərin ünvanına sərt ifadələr işlədib: “Biri var, yenə qaşınır. İtini-pişiyini, zombilərini üstümüzə qısqırdıb... Üç seçkidir doğru bilib yapdığı ancaq və ancaq yanlış olur, fəlakət gətirir, düşərgəni iflic edir, bölür, parçalayır. Amma nolsun, bəhanəsi var. “Yeni Müsavat”ı, Müsavat Partiyasını suçlatdırır, çamur atdırır, hər kəsi xəyanətkar elan edib durur kənarda... Mən həyatım boyu bunca həyasız birisini görmədim. Rüşvət alıb hansı məmurları qoruduğunu, əlinin kimlərin cibindən çıxdığını yazacam, yenə ara qarışacaq... Özü də bilir ki, nələri bilirəm...”

Qeyd edək ki, bununla bağlı “Qafqazinfo” baş redaktorla əlaqə saxlayıb. R. Arifoğlu açıqlamasında yazdığı statusa əlavə şərh vermək istəmədiyini deyib: “Mən üstümüzə gələn itlərə daş atmışam. Ayrı heç nə demək istəmirəm".