Fuad Qəhrəmanlı: “Müsavat cəmiyyəti və müsavatçıları aldadıb”

“Müsavat partiyası Milli Şuradan ayrılmaq barədə qərarını əsaslandırmaq üçün Milli Şuranı prezident seçkiləri üçün yaradılmış müvəqqəti seçki bloku adlandırmaqla həm cəmiyyəti, həm də sıravi müsavatçıları aldadıb”.

Lent.az-ın məlumatına görə, bu sözləri AXCP sədrinin müavini, Milli Şura üzvü Fuad Qəhrəmanlı özünün “facebook” hesabında yazıb.

Onun sözlərinə görə, Müsavat Partiyasında əvvəlcədən belə bir qərar var imiş və bundan ötrü sadəcə bəhanə axtarılırmış: “Bu aldatmanın arxasında yalnız bu qərarı qəbul etmiş bir qrup şəxsin özəl, korporativ marağı dayana bilər. Əgər belə deyilsə, o zaman nəyə görə Divanın qərarında doğru olmayan, yanlış əsaslandırma yer alıb? Ortada yalan varsa, deməli, sıravi müsavatçılardan və cəmiyyətdən gizlədilən bir iş, maraq da var. Bax, əsas məsələ də bundadır”.

AXCP sədrinin müavini bildirib ki, prezident seçkisi iki aydan artıqdır başa çatıb, ancaq Müsavat Partiyası bu günə qədər bir dəfə də olsa, Milli Şuranı seçki bloku olduğu üçün tərk edəcəyini səsləndirməyib, əksinə, İsa Qəmbər 3-4 gün öncə verdiyi müsahibədə qurumun fəaliyyətini gücləndirmək üçün onun idarə olunmasına, rəhbərliyinin formalaşmasına və s. dair 4 təklif verdiyini və bir çoxunun da həyata keçirildiyini bildirib: “İsa bəy özü də təsdiq edib ki, onlar Milli Şuraya heç də müvəqqəti seçki üçün yaradılmış blok kimi baxmırlar, əksinə, bu qurumu gücləndirmək, fəaliyyətini davam etdirmək üçün hətta təklif də verirlər. Hətta İsa bəy bir neçə gün öncə Müsavat Məclisində çıxış edən zaman Milli Şuradan ayrılmaq fikrində olmadıqlarını bildirmişdi. Demək, bu halda Milli Şuranı seçki ilə bağlı yaranmış müvəqqəti qurum olduğu üçün tərk etməklə bağlı Divanın qərarındakı bəhanəni İsa bəy 3-4 gün öncəki müsahibəsi və çıxışı ilə təkzib etmiş olur. Məntiqlə Müsavat partiyası əvvəlcədən Milli Şuraya müvəqqəti seçki bloku kimi baxmış olsa idi, İsa bəy bu fikirləri söyləməməli idi”.