Tamara Sinyavskaya yol qəzası nəticəsində ciddi xəsarət alıb

Lent.az-ın “RİA Novosti” agentliyinə istinadən verdiyi məlumata görə, qəza nəticəsində qabırğası sınan sənətçisi həkim nəzarəti altındadır.
Müslüm Maqomayev adına beynəlxalq müsabiqənin mətbuat xidmətinin bildirdiyinə görə, oktyabrın 23-25-də keçiriləcək müsabiqədə münsiflər heyətinin sədri olaraq Tamara Sinyavskayanın iştirakı sual altındadır: “Onun münsif kürsüsündə oturub, oturmayacağını demək hələ tezdir. Qəza dünən olub. Özünü necə hiss edəcəyi bu gün məlum olacaq. Ancaq Tamara xanım həkimlərin və dərmanların köməyi ilə müsabiqəyə qatılacağına ümid edir”.
Mətbuat xidməti onu da deyib ki, Tamara Sinyavskayanın müsabiqənin qala konsertində iştirak edə bilməyəcəyi dəqiqdir: “Əlbəttə, o, səhnəyə çıxmağı çox istəyirdi. Ancaq aldığı zədə çox ciddidir. Ona görə də təəssüf ki, qala konsertdə çıxış edə bilməyəcək”.
Qeyd edək ki, Müslüm Maqomayev adına müsabiqə ilk dəfə olaraq Rusiya paytaxtında keçiriləcək. Müsabiqə Tamara Sinyavskayanın rəhbərlik etdiyi Mədəni Musiqi İrsi Fondu tərəfindən təsis edilib.