Beynəlxalq Muğam Festivalına üç ifaçı qatılacaq

Qaliblərə pul mükafatları veriləcək

Martın 9-da Respublika Muğam müsabiqəsinin ikinci turu keçiriləcək. Bu turda müsabiqəyə qatılmış ifaçılar sərbəst repertuar seçiminə malik olacaq və hər iştirakçı öz istədiyi muğamı oxuyacaq.

Lent.az-ın məlumatına görə, bu barədə təhsil naziri Misir Mərdanov jurnalistlər üçün keçirdiyi mətbuat konfransında məlumat verib. Nazir bildirib ki, Heydər Əliyev Fondunun dəstəyi ilə keçirilən müsabiqəyə iştirak üçün 104 müraciət daxil olub. Martın 5-də keçirilmiş birinci turda 20-35 yaş arasında olan 27 ifaçı iştirak edib. Onlardan 10 nəfəri ikinci turda iştirak etmək hüququ qazanıb.

Misir Mərdanov bildirib ki, müsabiqənin ikinci turunda 3 nəfər qalib müəyyənləşdiriləcək və onlar Beynəlxalq Muğam Festivalında Azərbaycanı təmsil edəcəklər. Bu festivalda isə 4 qalib müəyyənləşdiriləcək. Festivalın Qran-Prini alacaq iştirakçıya 20 min, birinci yeri tutan ifaçıya 15 min, ikinci yeri tutana 10 min, üçüncü yerin sahibinə isə 5 min avro məbləğində pul mükafatı veriləcək.

Elxan SALAHOV