Smartfonu səssiz rejimdə saxlamaq bir çoxlarına xırda detal kimi görünsə də, araşdırmalar bu vərdişin diqqət, məhsuldarlıq və stress səviyyəsinə birbaşa təsir etdiyini göstərir. Getdikcə daha çox insan bildiriş səslərindən imtina edərək həm vaxtını, həm də psixoloji vəziyyətini daha yaxşı idarə etməyə çalışır.
Lent.az-ın xarici mediaya istinadən xəbərinə görə, tədqiqatçılar bildirir ki, hətta söndürülmüş telefon belə yaxınlıqda olduqda insanın düşünmə qabiliyyətini zəiflədə bilər.
Alim Adrian Uordun sözlərinə görə, smartfon əlçatan məsafədə olduqda, istifadə edilməsə belə, beyin resurslarını “məşğul” saxlayır və diqqəti azaldır.
Səssiz rejimdən istifadə edən insanlar adətən telefonu göz önündən uzaqlaşdırır. Bu isə diqqətin bərpasına və daha sakit iş mühitinin formalaşmasına kömək edir.
Diqqətin tez-tez bölünməsi məhsuldarlığı azaldır
Alimlər hesablayıb ki, hər bir diqqət yayındırıcı amildən sonra insanın yenidən tam fokuslanması üçün 20 dəqiqədən çox vaxt tələb olunur. Səssiz rejimdə olan istifadəçilər daha az bölünür və xüsusilə analitik və yaradıcı işlərdə tapşırıqları daha tez tamamlayırlar.
Şüurlu davranış və stressin azalması
Bildiriş səslərindən imtina edən insanlar telefona avtomatik reaksiya vermək əvəzinə, onu nə vaxt yoxlayacaqlarına özləri qərar verirlər. Bu da daha şüurlu davranış formalaşdırır və gündəlik stressi azaldır.
Tədqiqatçı Qloriya Mark qeyd edir ki, davamlı diqqət yayındırıcı amillər stressi artırır, əhvalı pisləşdirir və məhsuldarlığı aşağı salır. Bildirişlərin söndürülməsi isə sinir sisteminə düşən yükü azaldaraq “fon stressi”ni minimuma endirir.
Canlı ünsiyyətdə daha yüksək diqqət
Səssiz rejimdən istifadə edən insanlar real ünsiyyətdə daha diqqətli olur. Onlar qarşı tərəfi daha yaxşı dinləyir, detalların fərqinə varır və nəticədə daha effektiv ünsiyyət qururlar.
“Flow” vəziyyətinə daha tez daxil olmaq
Telefonun həm səsli, həm də vizual bildirişlərini məhdudlaşdırmaq insanın tam şəkildə işə fokuslanmasına şərait yaradır. Bu da “flow” adlanan dərin diqqət və məhsuldarlıq vəziyyətinə keçidi asanlaşdırır.
Mütəxəssislər vurğulayır ki, bu sadə vərdiş yüksək özünüdərk səviyyəsinin göstəricisidir. İnsanlar bildirişlərin təsirini anlayaraq daha balanslı həyat qurmağa çalışır. Bu isə yuxu rejimindən tutmuş ekranlardan uzaq istirahətə qədər bir çox sahədə müsbət nəticələr verir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
