“Bunu Rəşaddan gözləmirdik” – Ağamirzə Lent.az-a DANIŞDI

Meyxana ustası Ağamirzə Məmmədov Lent.az-ın əməkdaşının suallarını cavablandırıb.

Onunla qısa müsahibəni təqdim edirik:

- Ağamirzə bəy, çoxdandır efirlərdə sizi görmürük. Özünüzü necə hiss edirsiniz?
- Yaxşıyam, Allaha şükür. Efirlərə çıxmağa çox vaxtım olmur. Ancaq hərdən dəvət aldığım verilişlərə gedirəm.

- Sənət fəaliyyətinizdə hansısa bir yenilik var?
- İnşallah, bu yaxınlarda bir mahnım yayımlanacaq. İş gedir üzərində.

- Toylara, şənliklərə dəvət alırsınız bəs?
- Dəvət az olur. Əvvəlki kimi deyil. Ümumiyyətlə, toy azdır. Çağırılanda gedirəm.

- Həmkarınız, Rəşad Dağlının törətdiyi hadisə ilə bağlı nə deyə bilərsiniz?
- Bu barədə heç nə deyə bilmərəm. Təkcə onu deyim ki, ondan gözləmirdik bunu, yaxınımızdır. Bu xəbərə görə çox üzüldük, çox... Heç məlumatımız da yoxdur ki, hadisə necə baş verib.

- Sənət yoldaşları, yaxınları ilə əlaqə saxlayırsınız?
- Sənət yoldaşları deyəndə ki, elə biri mən. Arada yaxınları, dostları ilə danışırıq.

- Məlumatlara görə, öldürülən şəxs Ələkbər Yasamallının yaxın qohumudur. Onunla bu barədə danışmısınız?
- Ələkbər, ümumiyyətlə, ölkədə deyil. Səhhəti ilə bağlı xaricdədir, müalicə alır. Danışmamışıq özü ilə.

- Dostunuz Ağakərimi ziyarət edirsiniz? Vəziyyəti nə yerdədir?
- Sonuncu dəfə on gün bundan əvvəl Ağakərimi görməyə getmişdim. 10 dəfə salam verdim ona. Ancaq o yana, bu yana baxır. Bir kəlimə də danışmır, ancaq baxır. Deyirəm “Ağakərim, necəsən?”, reaksiya vermir. Yəni, səhhətində irəliləyiş yoxdur. Yaxşılıqdan söhbət belə getmir. Oğlu deyir ki, belə qalsa, yaxşıdır. Təki vəziyyəti pisləşməsin.

- Müalicəsi davam edir?
- Belə də. Dərmanları ancaq sakitləşdirsin, ağrılarını azaltsın deyə, qəbul edir. Yəni, nə vəziyyətinə təsir edir, nə də düzəldir. Olduğu kimi qalır. Allah köməyi olsun.

- Ağakərimi tanınmışlardan kimlərsə ziyarət edir?
- Gedib-gələni azdır. Son zamanlar meyxanaçılardan yanına kiminsə getdiyini eşitməmişəm.