Gələn il Bakıda mağaza və əmlak kompleksləri satışa çıxarılacaq

“Azərsutikinti” açıq səhmdar cəmiyyətinin törəmə müəssisəsi də 103 min 425 manata hərraca çıxarılacaq

Gələn il Bakıda 2 mağaza və 2 əmlak kompleksi hərraca çıxarılacaq.
Lent.az-ın Əmlək Məsələləri Dövlət Komitəsinin rəsmi saytına istinadən verdiyi məlumata görə, 2011-ci il yanvarın 11-də Bakı şəhəri, Xəzər rayonu Albalılıq yaşayış massivində 157 saylı mağaza satışa çıxarılacaq.

Mağazanın start satış qiyməti 1234 manatdır. Bakı şəhəri, Xəzər rayonu, Şüvəlan qəsəbəsi, Ə.Qarayev küçəsi, 66 ünvanında yerləşən, sahəsi 117 kvadratr metr olan 137 saylı mağazanı almaq istəyənlərin isə bu hərraca qatılmaq üçün minimum 10 min 287 manatı olmalıdır.
Paytaxtda satışa çıxarılan əmlak komplekslərinə gəlincə, onların start qiyməti daha bahadır. Bakı şəhəri, Səbail rayonunda yerləşən daşınar əmlak kompleksinin start qiyməti 21 min 409 manatdır. Bakı şəhəri, Binəqədi rayonu, Ə.Əliyev küçəsi, 129 a ünvanında yerləşən, sahəsi 428,7 kvadrat metr olan əmlak kompleksinin start qiyməti isə 49 min 200 manatdır.

Bundan əlavə, yanvarın 11-də “Azərsutikinti” açıq səhmdar cəmiyyətinin Göyçayda yerləşən və sahəsi 797,5 kvadrat metr olan törəmə müəssisəsi də satışa çıxarılacaq. “Şirvansutikinti” törəmə müəssisəsini almaq istəyənlərin hərraca minimum 103 min 425 manatla gəlmələri lazımdır.