Azad Rəhimov: “Mişel Platininin fikirləri ilə razılaşmıram”

Gənclər və idman naziri Azad Rəhimov UEFA prezidenti Mişel Platininin 2020-ci il Avropa çempionatını müxtəlif şəhərlərdə keçirilməsinə dair təklifinə münasibət bildirib. Lent.az-ın məlumatına görə, Rəhimov Beynəlxalq İdman Jurnalistləri Assosiasiyasının Bakıda təşkil etdiyi “Gənc jurnalistlər proqramı” iştirakçıları ilə görüşündə bu haqda açıqlama verib.

Nazir Platininin fikri ilə razılaşmadığını bildirib: “Hələ UEFA prezidentinin təklifi təsdiqlənməyib, qurumun İcraiyyə Komitəsində müzakirə olunacaq. Bu təklif real deyil və dəstəklənəcəyinə inanmıram. Çünki yenicə dirçəliş dövrünə qədəm qoyan ölkələrdə futbolun inkişafına təkan vermir”.

Qeyd edək ki, 2020-ci il Avropa çempionatına Azərbaycan və Gürcüstan birgə namizədliklərini irəli sürüb. UEFA prezidenti Mişel Platini isə çempionat oyunlarının bir və ya iki ölkədə deyil, hazır futbol infrastrukturuna malik ayrı-ayrı ölkələrdə keçirilməsini təklif edib.

Elşən MƏMMƏDOV