Tümendən Bakıya gələn həmyerlimizin 40 min dolları müsadirə olundu

Rusiyanın Tümen şəhərinin Kalinin rayon məhkəməsi Azərbaycan vətəndaşı olan 58 yaşlı qadın barəsində hökm çıxarıb. Lent.az-ın Ural Nəqliyyat Prokurorluğuna istinadən məlumatına görə, həmyerlimiz Gömrük İttifaqına daxil olan ölkənin hüdudlarından iri məbləğdə nağd pul vəsaitini qeyri-qanuni keçirməkdə günahkar bilinib.

İlkin araşdırmalar nəticəsində müəyyən edilib ki, 2013-cü il avqustun 15-də Roşino Hava Limanının gömrük-keçid məntəqəsində Tümen – Bakı reysi ilə uçmaq istəyən Azərbaycan vətəndaşı 40 min dollardan çox pul vəsaitini gömrük sərhədindən keçirməyə cəhd edib. Amma o, gömrük bəyannaməsində bu barədə qeyd aparmayıb.

Gömrük qanunvericiliyinə əsasən, Gömrük İttifaqına daxil olan ölkənin gömrük sərhədindən yazılı bəyan etmədən 10 min dollardan çox vəsaitinin keçirilməsinə icazə verilmir. Bu səbəbdən, məhkəmə adı açıqlanmayan qadına bəyan etmədiyi pulları da müsadirə edilməklə, 30 min rubl cərimə kəsib. Hökm qanuni qüvvəyə minib.