Polisi bıçaqlayanın kimliyi məlum olub - YENİLƏNİB

Zaqatalada polis zabitinə bıçaq xəsarətləri yetirən şəxsin kimliyi məlum olub.

Məlumata görə, cinayəti törədən Zaqatala şəhəri, Dağıstan küçəsi, ev 14-də yaşayan Camalov Ceyhun Camal oğludur.

Hüquq-mühafizə orqanlarından APA-ya verilən xəbərə görə, polis kapitanı Anar Zeynalova bıçaq xəsarətləri yetirən Camalov Ceyhun Camal oğlu hadisə yerindən qaçıb. Hazırda Camalovun istintaqa cəlb edilməsi istiqamətində axtarış-əməliyyat tədbirləri davam etdirilir.

Faktla bağlı Zaqatala Rayon Prokurorluğunda cinayət işi başlanıb.

***

20.50

Zaqatalada polis əməkdaşı bıçaqlanıb.

Zaqatala Mərkəzi Rayon Xəstəxanasından APA-nın Şəki-Zaqatala bürosuna verilən xəbərə görə, axşam saat 20 radələrində Anar Zeynalov boğaz və kürək nahiyəsindən kəsilmiş-deşilmiş bıçaq xəsarətləri ilə xəstəxanaya daxil olub. O, hazırda cərrahiyyə şöbəsindədir, üzərində əməliyyat aparılır.

Onun vəziyyətinin ağır olduğu bildirilir.

Zaqatala rayon hüquq-mühafizə orqanlarından APA-ya verilən məlumata görə, Anar Zeynalov Zaqatala RPŞ əməkdaşıdır, kapitan rütbəsində sahə müvəkkilidir.

Hadisənin təfərrüatları hələlik məlum deyil.