Kanadalı general Əfqanıstanda tutulub

Kanadanın Əfqanıstandakı qoşununun keçmiş komandanı, briqada generalı Dainel Menard Kabulda həbs olunub.

Lent.az-ın «RİA Novosti»-yə istinadən məlumatına görə, bu haqda Kanadanın «Globe and Mail» qəzeti «Garda World» şirkətinin təmsilçisinə əsaslanaraq, xəbər yayıb.

Mənbənin məlumatında bildirilib ki, o, silah qaçaqmalçılığında şübhəli bilinir.

General 2009-cu ildə Əfqanıstanın Qəndəhar əyalətindəki Kanada hərbçilərinin komandanı olub. 2010-cu ildə D.Menard tabeçiliyində olan qadın- zabitlə eşq macərasına görə komandanlıqdan uzaqlaşdırılıb.

2012-ci ildə o, Əfqanıstana «Garda World» şirkətinin hərbi-mühafizə hissəsinin əməkdaşı kimi qayıdıb.

Qəzetin yazdığına görə, yanvarın 10-da Əfqanıstan Daxili İŞlər Nazirliyinin rəsmi nümayəndələri görüşdən sonra keçmiş hərbçi həbs olunub.

Kabulun polis rəisi, general Zahir Zahir silah qaçaqmalçılığında onun iştirakından şübhələnildiyi haqda açıqlama verib.

«Garda World»-un təmsilçisi Co Gavaqan isə bildirib ki, «inzibati anlaşılmazlıq» var və şirkət bunun tezliklə həll olunacağına inanır.