Tiflisdə etiraz aksiyası: «Hərbçilərimizi Əfqanıstandan çıxarın»

Tiflisdə bir qrup ölkə parlamentinin binası qarşısında etiraz aksiyası keçirib.

Lent.az-ın xarici informasiya vasitələrinə istinadən məlumatına görə, 30-a yaxın aksiyaçı Gürcüstan hərbçilərinin Əfqanıstandan çıxarılmasını tələb edib.

Onlar jurnalistlərə bildirib ki, Əfqanıstandakı savaşının Gürcüstana aidiyyəti yoxdur.

Bu tələblə Gürcüstan Leyborist Partiyası da çıxışı edib. Partiyanın baş katibi Georgi Quqava brifinqdə deyib: «Biz təklif edirik ki, oktyabrda keçiriləcək prezident seçkisi ilə yanaşı, Gürcüstan hərbçilərinin Əfqanıstandan çıxarılması məsələsi də referenduma çıxarılsın».

Jurnalistlərə müsahibəsində ölkə parlamentinin sədri David Usupaşvili məsələ ilə bağlı bunları bildirib : «Əgər Gürcüstan hərbçiləri Əfqanıstandan çıxsa, onda avropalı müşahidəçilər də Gürcüstandan çıxacaqlar. Bu halda işğal olunmuş ərazidəki xətt yüz metr deyil, yüz kilometr irəli çəkiləcək».

Xatırladaq ki, bu günlərdə Cənubi Osetiyadakı müvəqqəti atəşkəs xətti bir neçə kilometr irəli çəkilib.

Baş nazir Bidzina İvanişvili birmənalı şəkildə bildirib ki, qurbanların olmasına baxmayaraq, Gürcüstan hərbçiləri Əfqanıstandan çıxarılmayacaq.