Rusiyalı həmsədr: “Mövqeləri dəqiqləşdirmək vaxtıdır”

“Bakıdakı danışıqlar zamanı müzakirə olunan məsələlər arasında Azərbaycan və Ermənistan prezidentləri səviyyəsində görüşün təşkili də var idi”. Lent.az-ın məlumatına görə, bunu İrəvanda jurnalistlərə açıqlamasında ATƏT-in Minsk Qrupunun rusiyalı həmsədri İqor Popov deyib.

O, Bakıda Azərbaycan prezidenti İlham Əliyev, xarici işlər naziri Elmar Məmmədyarov və müdafiə naziri Zakir Həsənovla görüşdüyünü xatırladıb. Popov bildirib ki, prezidentlər səviyyəsində görüşün mövzusuna bu gün Ermənistan prezidenti Serj Sərkisyanla təmas zamanı da toxunacaq.

Həmsədr deyib: “Haradasa 2 ilədək təmaslar xarici işlər nazirləri səviyyəsində aparılıb, irəliyə doğru hərəkət üçün kifayət qədər variant işlənilib. İndi isə fikrimcə, mövqeləri dəqiqləşdirmək və gələcəkdə necə işləmək üçün yüksək səviyyədə görüşün vaxtı yetişib. Bu mövqeyimi xarici işlər nazirləri də bölüşürlər”.

Qeyd edək ki, ötən gün Azərbaycan və Ermənistan prezidentlərinin dekabrda görüşəcəklərinə dair xəbər yayılıb.