Romada Azərbaycan günü

Romanın Tor Vergata Universitetində Azərbaycana həsr olunan təqdimat keçirilib. Lent.az-ın məlumatına görə, tədbiri universitetin beynəlxalq münasibətlər və əməkdaşlıq üzrə prorektoru professor Pietro Masi çıxış sözüylə açıb. P. Masi təqdimat iştirakçılarına Universitetin rektoru professor Renato Lauronun salamlarını çatdırandan sonra İtaliya ilə Azərbaycan arasında çoxsahəli əlaqələrin mövcud olduğunu deyib.

Azərbaycan Respublikasının İtaliyadakı səfiri Vaqif Sadıqov ölkəmizin tarixi, Azərbaycan-İtaliya əlaqələrin tarixi və müasir vəziyyəti, regionda həyata keçirilən irimiqyaslı iqtisadi və nəqliyyat layihələri, Ermənistan-Azərbaycan Dağlıq Qarabağ münaqişəsinin tarixi və indiki vəziyyəti barədə tədbir iştirakçılarına ətraflı məlumat verib.

Tədbirdə iştirak edən digər professorlar Nikolo Vittorio, Massimo Papa, Nikolo Kosta, Roberto Verzikko və Paola Sinibaldi ali təhsil sistemin təkmilləşdirilməsi sahəsində Avropada aparılan layihələrdə Azərbaycanın ali məktəblərinin uğurla iştirakının vacibliyini qeyd ediblər. Tədbirin sonunda V.Sadıqov verilən sualları cavablandırıb, ölkəmizin təhsil sistemi barədə məlumat verib.

Təqdimatda “Tor Vergata” Universitetinin professor-müəllim, tələbə heyətinin üzvləri və mətbuat orqanlarının nümayəndələri iştirak edib.