Kasparov Latviyadan vətəndaşlıq istədi

Şahmat üzrə keçmiş dünya çempionu, Rusiyanın müxalif siyasətçisi Harri Kasparov ona Latviya vətəndaşlığının verilməsini xahiş edib. Lent.az-ın “TV-NET”ə istinadən verdiyi məlumata görə, müvafiq məktubu Latviya Seyminin bütün fraksiyaları alıb.

Bu xahiş barədə bir neçə deputat öz “twitter” səhifələrində yazıblar. “Vəhdət” partiyasının Seymdəki nümayəndəsi Aynar Latkovskis bildirib ki, Kasparov Latviya qarşısındakı xüsusi xidmətlərinə görə, vətəndaşlıq istəyib. O, Rusiya vətəndaşlığının saxlanılmasını da xahiş edib. Məsələyə nə zaman baxılacağı məlum deyil.

Qeyd edək ki, Harri Kasparov 1963-cü ildə Bakıda doğulub. O, dünyanın ən məşhur və titullu şahmatçılarındandır. Son illər siyasətlə məşğul olan Kasparov 2005-ci ildə Birləşmiş Vətəndaş Cəbhəsi yaradaraq, Rusiya müxalifətini birləşdirmək üçün çoxsaylı cəhdlər edib. Məşhur şahmatçı iyunda Təhqiqat Komitəsinə söhbətə çağırılmasını səbəb göstərərək, Rusiyadan ayrılıb. O, yaxın vaxtlarda bu ölkəyə qayıtmağı düşünmədiyini bildirib.