Ərdoğan terrorun bitməsindən, müavini Kürdüstandan danışdı...

Türkiyənin baş naziri Rəcəb Tayyib Ərdoğan ölkədə PKK terrorunun artıq bitmə nöqtəsinə çatdığını bildirib. Lent.az-ın Türkiyənin NTV telekanalına istinadən verdiyi məlumata görə. Rəcəb Tayyib Ərdoğan xalqa müraciətində deyib ki, Türkiyə üçün yeni, tərtəmiz bir səhifə açılır.

Rəcəb Tayyib Ərdoğan bəzən kimlərinsə kənardan müdaxiləsi ilə qardaşlar arasında nifaq ola biləcəyini, ancaq nə baş verməsindən asılı olmayaraq qardaşların bir araya gələcəyini, hallaşacağını söyləyib: “Təmkinli olmaqla təxribatlara imkan verməməklə, qorxaqlara qulaq asmamaqla yolumuza davam edəcəyik”.

Bu arada AKP sədrinin müavini Hüseyn Çəlik Ərbildə Şimali İraq Kürdüstan Muxtariyyətinin rəhbəri Məsud Bərzani ilə görüşüb. Dünən mətbuat üçün qapalı keçən görüşdən sonra Hüseyn Çəlik mayın 8-dən başlayaraq Türkiyəni tərk edəcək PKK terrorçularının Şimali İraqda Qəndil dağındakı düşərgələrə yerləşməsi prosesinə Məsud Bərzaninin dəstək verəcəyinə, konstruktiv rol oynayacağına inandığını vurğulayıb. Çəlik çıxışında “İraq Kürdüstanı” ifadəsini də işlədib: “Osmanlı dönəmində də xəritədə Kürdüstan vardı. Bu sözü dilə gətirməkdən çəkinməyə gərək yoxdur. Türkiyədə keçmişdə bu ifadəyə bir qadağa vardı, indi belə bir qadağa yoxdur. Məsud Bərzani də İraq Kürdüstanının lideridir və PKK-nın da ən çox sığındığı Qəndil dağı da buranın bir parçasıdır. Türkiyədən çıxıb bura gələcəklər. Bu prosesdə Məsud Brəzaninin aktiv iştirak edəcəyinə əminik”.