Baxçalı Gezi parkı olaylarını PKK-ya bağladı

Türkiyədə Milli Hərəkat Partiyasının (MHP) sədri Dövlət Baxçalı İstanbulda Gəzi parkında başlayan və bütün ölkəyə yayılan aksiyalarla bağlı gözlənilməz bəyanat verib.

Lent.az-ın “Hürriyet” qəzetinə istinadən verdiyi məlumata görə, Baxçalı MHP İdarə Heyətində çıxışında aksiyaların arxa planında PKK terror təşkilatı və radikal solçu təşkilatların olduğunu söyləyib.

Dövlət Baxçalı aksiyalarda məsum insanların da iştirak etdiyini bildirib: “Aksiyada PKK ilə hökumət arasındakı çözüm prosesində terror təşkilatının rəhbərinin tələbinə əsasən konfranslar keçirənlər ilə aksiyaların arxasındakı insanlar eynidir. Bu aksiyalarda gördüyümüz, etirazını bildirən sənətçilər o vaxt niyə səslərini çıxarmadılar? Orada PKK-nın yenidən dirçəlişinə hazırlıq işləri gedir. PKK ilə heç bir şərt çərçivəsində bir araya gəlmək mümkün deyil. Dörd ağacın altında da bir araya gəlmərik. Millət hökumətin təzyiq siyasətinə qarşı durmağı MHP-nin “Milli Dəyərləri Qoru və Yaşat!” şüarları ilə keçirilən mitinqləri ilə öyrənib. Ancaq biz bunu meydanlarda, demokratik haqlarımızdan istifadə edərək təşkil edirdik”.

Dövlət Baxçalı partiyanın rəhbərliyində təmsil olunan şəxslərə sosial media ilə bağlı da xəbərdarlıq edib. O deyib ki, partiya rəhbərliyindəki şəxslər mesaj yazarkən partiya məsuliyyətini yaddan çıxarmamalıdırlar.