Misir İsrailə qaz vermir

Lent.az-ın “mignews.com” saytına istinadən verdiyi məlumata görə, EMG şirkəti İsrailə Misir qazının ötürülməsinin mayın sonuna qədər bərpa ediləcəyinə söz versə də, bu, real sayılmır.

Misirin neft naziri Adall Qxorab Al Masry “al-Youm” qəzetinə müsahibəsində deyib ki, İsrail Misir qazını dünya bazarlarındakı qiymətlərə uyğun almaqla bağlı təklifi qəbul etməyib. İsrail bildirib ki, 2009-cu ildə imzalanmış müqavilədə qeyd olunur ki, qazın qiymətinə 2013-cü ildən tez baxılmayacaq.

Adall Qxorab Al Masry bəyan edib ki, Qahirə İsrailə qaz ixracına sırf iqtisadi nöqteyi-nəzərdən yanaşır və məqsəd Misir xalqının daha çox gəlir əldə etməsinə nail olmaqdır. O, qaz məsələsi ətrafındakı mübahisənin siyasi xarakter daşımadığını iddia edib.

Xatırladaq ki, İsrailə qaz ixracı Misirdə aksiyalar nəticəsində prezident Hüsnü Mübarəkin istefa verməsindən az sonra dayandırılıb. Hüsnü Mübarək və nazirlərinə qarşı irəli sürülən ittihamlardan biri də Misir qazının ucuz qiymətə İsrailə satılması ilə bağlıdır.