Mübarəkin sarayına yürüş olacaq

Ötən gecə Misir prezidenti Hüsnü Mübarəkin sentyabrda keçiriləcək seçkilərdə namizəd olmayacağını, ancaq seçkilərə qədər istefa verməyəcəyini açıqlaması Qahirədəki Təhrir meydanına toplaşan milyonlarla insanı razı salmayıb. Lent.az-ın Türkiyənin “NTV” telekanalına istinadən verdiyi məlumata görə, Hüsnü Mübarəkin istefasını tələb edən kütlə Təhrir meydanını tərk etmək istəmir və tələbləri yerinə yetirilənə qədər aksiyanın davam edəcəyi vurğulanır.

O da məlum olub ki, həftənin cümə günü Prezident Sarayına yürüş olacaq. Məqsəd Hüsnü Mübarəkin istefa verərək ölkəni tərk etməsinə nail olmaqdır.

Bu arada İsgəndəriyyə şəhərində Hüsnü Mübarək tərəfdarları və əleyhdarları arasında toqquşma baş verdiyi barədə xəbərlər gəlib. Hərbi hissələr daş və dəyənəklərlə silahlanan tərəfləri ayırmağa çalışsa da, buna nail ola bilməyib. Şahidlər çoxlu sayda yaralının olduğunu bildirirlər.