Ərdoğan Mübarəkə səsləndi

Türkiyənin baş naziri Rəcəb Tayyib Ərdoğan Böyük Millət Məclisindəki çıxışında Misirdə baş verən olaylara münasibət bildirib. Lent.az-ın “haberturk.com” saytına istinadən verdiyi məlumata görə, Rəcəb Tayyib Ərdoğan deyib ki, xalq qarşısında heç bir iqtidar duruş gətirə bilməz.

Rəcəb Tayyib Ərdoğan Misir prezidenti Hüsnü Mübarəkə çağırış edib: “Hüsnü Mübarəkə səmimi bir tövsiyə etmək istəyirəm. Biz insanıq, daimi deyilik, bir zaman hamımız öləcəyik. Hər birimizin getdiyi yer 2 metrlik çuxurdur. Sənin özünlə bərabər bu dünyadan aparacağın yalnız kəfən olacaq. Ona görə də o kəfənin qədrini, qiymətini bilək. Həm vicdanımızın səsinə, həm xalqımızın səsinə, onların xeyir və ya bəd dualarına hazır olaq. Ona görə də deyirəm ki, xalqın səsinə, insani tələblərinə qulaq asın, qulaq asaq. Xalqın dəyişiklik arzusunu tərəddüd etmədən qarşılayın. İstismarçıların, qaranlıq dairələrin Misir üzərində ssenarilərinin həyata keçməsinə fürsət vermədən öncə siz addım atın. Xalqı təmin edəcək addımlar atın”.

Türkiyənin baş naziri vurğulayıb ki, bu gün dünyada azadlıqların qarşısı artıq alına bilməz: “Aylarla sürən seçkilərin adı demokratiya ola bilməz, biz 24 saata seçkini bitiririk. İstəyimiz bu olayların böyük acılara səbəb olmadan təcili sona çatması, xalqın hüquqi və haqlı tələblərinin yerinə yetirilməsidir. Qardaş Misir xalqının yanında olmağa davam edəcəyik”.