Ermənistandakı AES-də sızma olduğu şübhəsi yaranıb

Türkiyə sərhədləri yaxınlığında yerləşən Ermənistanın Metsamor Atom Elektrik Stansiyasında (AES) radiasiya sızması olmasından şübhələnir. Lent.az-ın “Hürriyət” qəzetinə istinadən verdiyi məlumata görə, Çekmece Nüvə Araşdırma və Təlim Mərkəzi ilə Ərzurum Atatürk Universitetinin fizika fakültəsi tərəfindən Iğdır, Ağrı, Muş, Tunceli, Hakkari və Şırnakda radiasiya ölçmələri aparılmağa başlanılıb.

Professor Neslihan Ekinci deyib ki, araşdırmaya İğdırdan başlayıblar. Yanvarın 13-də İğdır şəhərinin müxtəlif yerlərində radiasiya ölçmə cihazları yerləşdirilib. Məqsəd İğdırın radiasiya xəritəsinin çıxarmaqdır. Mütəxəssislər son zamanlar artan ağciyər xərçənginin səbəbinin də radiasiya olduğunu güman edirlər. Ölçmə işləri 60 gün davam edəcək. İğdırda torpaq və su nümunələri də analizdən keçiriləcək.

Professor Mikdat Kadıoğlu isə bildirib ki, ölçmə işləri nəticəsində radiasiyanın səviyyəsi üzə çıxacaq, Metsamor AES-də sızıntının aşkarlanması isə meteoroloji analizlə mümkün olacaq: “Əgər radiasiya səviyyəsi artıbsa, deməli, iş işdən keçib və nüvə sızıntısı baş verib. İşimiz bölgədəki insanların bu radiasiyadan daha az zərər görməsi istiqamətində qurulacaq”.