“Taliaban”in yaradıcısı silahdaşları tərəfindən edam edilib

Lent.az-ın “newsru.com” saytına istinadən verdiyi məlumata görə, “polkovnik İmam” kimi məşhurlaşan Sultan Amir Tarar “Taliaban” Hərəkatının qurucusu olub.

Pakistan kəşfiyyatının ən güclü əməkdaşlarından biri olan Sultan Amir Tarar 1980-ci illərdə “Taliaban”ın yaradılmasına rəhbərlik edib. Hərbi xidmətdən gedənə qədər o, Əfqanıstan və Pakistanda fəaliyyət göstərən “Taliaban” hərəkatları arasında böyük nüfuza malik şəxs olub. Eyni zamanda Pakistan kəşfiyyatının rəhbərliyi ilə Pakistan-Əfqanıstan sərhədindəki “Taliaban” silahlıları arasında vasitəçi missiyasını yerinə yetirib.

Ancaq 2010-cu ilin martından ölümünə qədər “polkovnik İmam” Pakistan “Taliaban”ına yaxınlığı ilə seçilən və Şimali Vəziristan bölgəsində fəaliyyət göstərən “Asiya pələngləri” qruplaşmasının əsiri olub. O, Pakistan kəşfiyyatının keçmiş əməkdaşı Xvacoy Xalid və jurnalist Əsəd Kureşi ilə birlikdə oğurlanıb. Silahlılar “polkovnik İmam”ın ailəsindən onun azadlığa buraxmaq üçün böyük məbləğdə pul istəsələr də, ailə bu pulu ödəyə bilməyib. Buna görə də silahlılar onu edam ediblər. Digər versiyaya görə, Sultan Amir Tarar əsirlikdə ürək tutmasından vəfat edib.