Obama yenidən prezident olmaq qərarı verdi

Lent.az-ın “Associated Press” agentliyinə istinadən verdiyi məlumata görə, Ağ Evin sözcüsü Robert Qibbs bildirib ki, yaxın vaxtlarda Barak Obamanın prezidentliyə namizədliyini irəli sürmək üçün lazım olan bütün sənədləri hazırlayaraq Federal Seçki Komissiyasına göndərəcək.

Robert Qibbs deyib ki, sənədlərin təqdim olunduğu vaxtdan başlayaraq seçki kampaniyasının start götürdüyünü demək olar. O, Barak Obamanın seçki qərargahının Çikaqoda yerləşəcəyini söyləyib. Yanvarın sonunda Robert Qibbs, Barak Obamanın məsləhətçisi Devid Akselrod və Ağ Ev Administrasiyasının rəhbərinin müavini Cim Messina Çikaqoya yola düşəcək. Qərargaha Ağ Ev administrasiya rəhbərinin müavini Cim Messina rəhbərlik edəcək.

Demokratlar seçki kampaniyasında əsas arqument olaraq mübahisəli səhiyyə islahatları, ABŞ qoşunlarının İraqdan çıxarılması, Əfqanıstanda hərbi missiyanın davam etdirilməsi və Barak Obama administrasiyasının ümumdünya iqtisadi böhranı dövründə atdığı addımları qabartmaq niyyətindədir.

Respublikaçıların əsas əks-arqumentləri isə sosial islahatların uğursuzluğunu vurğulamaq və işsizliyin yüksək səviyyəsi ilə bağlı olacaq. Onlar Barak Obamanı dövlət vəsaitini israf etməkdə günahlandırmağa da hazırlaşırlar.