Şimon Peresin arvadı öldü

Lent.az-ın “mignews.com” saytına istinadən verdiyi məlumata görə, Sonya Peres 87 yaşında həyatını itirib.

Sonya Peres Ukraynada anadan olub, sonradan ailəsi ilə birlikdə İsrailə köçüb. 1940-cı illərdə Ben-Şemen qəsəbəsində məktəbdə oxuyarkən gələcək əri Şimon Pereslə tanış olub. Məktəbi bitirdikdən sonra könüllü olaraq Böyük Britaniya ordusunda yəhudi qadın bölüyünə daxil olub, yük maşınının sürücü işləyib, sonralar döyüşlərdə də iştirak edib.

Sonya Peres Fələstinə qayıtdıqdan sonra 1 may 1945-ci ildə Şimon Pereslə ailə qurub. Qısa müddət sonra Şimon Peres müdafiə naziri təyin olunub. Ailə yeni dünyaya gələn Tsvikya adlı qızları ilə Təl-Əvivə köçüb. Təl-Əvivdə onların Xem və Yon adlı oğlan övladları dünyaya göz açıblar.

Şimon Peres İsrail prezidenti seçildikdən sonra 2007-ci ildə Qüdsdəki prezident sarayına köçüb. Ancaq Sonya Peres onunla Qüdsə köçməkdən imtina edib və Təl-Əvivdə yaşamağa davam edib. Ancaq cütlüyün münasibətlərində hər hansı dəyişiklik olmayıb. Şimon Peres həmişə Sonyanı həyatının yeganə məhəbbəti adlandırıb.