Fələstin BMT-yə İsraillə bağlı layihə təqdim edib

Fələstin hökuməti İsrailin işğal altındakı torpaqlarda yəhudi yaşayış məskənləri inşa etməsinə mane olmaq üçün BMT Təhlükəsizlik Şurasına müraciət edib.

Lent.az-ın “trt.net.tr” saytının Azərbaycan versiyasına istinadən verdiyi məlumata görə, Təhlükəsizlik Şurasına təqdim edilən qətnamə layihəsində yəhudi yaşayış məskənlərinin qanunsuz elan edilməsi tələb olunub.

Fələstin hökumətinin rəhbərliyi altında hazırlanan layihədə qeyd olunur ki, 1967-ci ildən bəri işğal edilən Fələstin torpaqlarında salınan, Şərqi Qüds də daxil olmaqla bütün yəhudi yaşayış məskənləri qanunsuzdur və daimi sülhün təmin olunmasının qarşısındakı ən böyük əngəldir. Bundan əlavə, sənəddə İsrailin ən qısa zamanda bütün yaşayış məskənlərinin tikintisini dayandırması tələb olunur.

Layihəyə Türkiyə də daxil olmaqla, 120-yə yaxın ölkə dəstək verib. ABŞ isə sənədin gündəliyə salınmasına belə qarşı çıxıb. Vaşinqton yaşayış məskənləri məsələsinin müzakirələrlə həll oluna biləcəyini, bunun üçün Təhlükəsizlik Şurasında səsverməyə ehtiyac olmadığını bildirib və qətnaməyə veto qoyacağına dair mesaj verib.

Təhlükəsizlik Şurasının digər 14 üzvü isə qətnaməyə dəstək verib.