Lavrov Türkiyəyə gedir

Rusiyanın xarici işlər naziri Sergey Lavrov Birgə Strateji Planlaşdırma Qrupunun ilk toplantısında iştirak məqsədilə yanvarın 20-də Türkiyəyə gedəcək.

Lent.az-ın “trt.net.tr” saytının Azərbaycan versiyasına istinadən verdiyi məlumata görə, Sergey Lavrov səfər zamanı Türkiyənin xarici işlər naziri Əhməd Davudoğlu ilə görüşəcək. Görüş Türkiyənin baş naziri Rəcəb Tayyib Ərdoğanla Rusiya prezidenti Dmitri Medvedevin rəhbərlik etdiyi Yüksək Səviyyəli Əməkdaşlıq Şurasının alt qolu olan Birgə Strateji Planlaşdırma Qrupunun ilk toplantısı çərçivəsində baş tutacaq. Toplantıda Rusiya-Türkiyə əməkdaşlığındakı yeni mexanizmin təşkilati məsələləri müzakirə olunacaq, Avropanın təhlükəsizliyi ilə bağlı problemlər, Balkanlar, Qafqaz və dünyanın digər bölgələrindəki durum da daxil olmaqla ikitərəfli və beynəlxalq məsələlər ətrafında fikir mübadiləsi aparılacaq.

Əhməd Davudoğlu və Sergey Lavrovun rəhbərliyi ilə keçiriləcək toplantıda mart ayının ortalarında Moskvada keçirilməsi planlaşdırılan Yüksək Səviyyəli Əməkdaşlıq Şurası toplantısına hazırlıq gözdən keçiriləcək. Yüksək Səviyyəli Əməkdaşlıq Şurası toplantısına Rəcəb Tayyib Ərdoğan və Dmitri Medvedev rəhbərlik edəcək.