Tunisdə sular durulmur

Lent.az-ın “trt.net.tr” saytının Azərbaycan versiyasına istinadən verdiyi məlumata görə, ölkədə minlərlə insan dünən qurulduğu elan edilən milli etimad hökumətinə etiraz edib.

Nəticədə bu gün yeni hökumətin 3 naziri istefa verib. Nümayişçilər yeni hökumətin tərkibində devrilən prezident Zeynəlabdin Bin Əliyə yaxın adamların olmasına etiraz ediblər. Polis nümayişi gözyaşardıcı qaz və dəyənəklərlə dağıdıb.

Bununla yanaşı, polis Bin Əli rejimi tərəfindən fəaliyyəti qadağan olunan İslamçı Oyanış Partiyasının keçmiş lideri Sadıq Şurunu da döyüb. 20 il həbsdə yatdıqdan sonra keçən ilin oktyabrında azadlığa çıxan Sadiq Şuru deyib ki, yeni hökumətin xalqı təmsil etmir və istefa verməlidir.

Partiyanın Fransadakı rəhbərlərindən olan Hüseyn Cəziri də Tunisdə 6 ay ərzində keçirilməsi nəzərdə tutulan prezident seçkilərində namizəd irəli sürməyəcəklərini, ancaq parlament seçkilərində iştirak edəcəklərini bildirib. Hüseyn Cəziri baş naziri Məhəmməd Qannuçinin dünən açıqladığı yeni kabinetdə yalnız 3 qanuni müxalifət partiyası təmsilçisi olduğunu, əsas qüvvələrin kənarda qoyulduğunu vurğulayıb. Rejimin dəyişməsində böyük rol oynayan Mərkəzi Həmkarlar İttifaqı (UGTT) də yeni hökuməti tanımadığını açıqlayıb. İttifaq bu gün keçirilən fövqəladə toplantısında hökumətdəki üç naziri istefa verməyə çağırıb. Nazirlər istefa veriblər.