Bişkekdə terrorçu qrupun üzvləri saxlanılıb

Qırğızıstanda xarici ölkə səfirliklərinin, o cümlədən 2009-cu ildən ABŞ hərbi Hava Qüvvələrinin aviabazası yerləşmiş Tranzit Yükdaşımalar Mərkəzinin yaxınlığında partlayışlar törətməyə hazırlaşan terrorçu qrup saxlanılıb. Lent.az-ın “İTAR-TASS” agentliyinə istinadən verdiyi məlumata görə, bu barədə bu gün keçirdiyi mətbuat konfransında Qırğızıstan Milli Təhlükəsizlik Komitəsinin sədri Keneşbəy Duyşebəyov məlumat verib.

Keneşbəy Duyşebəyov deyib ki, saxlanılanlar törətmək istədikləri əməlləri etiraf ediblər. Eyni zamanda keçən il Bişkekdəki sinaqoq və Respublika İdman Sarayı yaxınlığında partlayışların da onlar tərəfindən törədildiyini bildiriblər: “Cayşul Mehdi” adlı bu qruplaşmanın 11 aktiv üzvü var və onların 8-i saxlanılıb. 3 nəfərin axtarışı hələ davam edir. Qrupun lideri Sovetbəy İslamov xüsusi əməliyyat zamanı güllələnib”.

İlkin məlumatlara görə, saxlanılanlar Bişkekdə 3 milis əməkdaşının güllələnməsi hadisəsində də iştirak ediblər.