Bələdiyyə sədrinin “Mardan Palace”da rus qızlarla şəkli yayımlandı- FOTO

Türkiyənin müxalifətdə olan Milliyətçi Hərəkat Partiyasının (MHP) üzvü, Antalyanın Aksu qəsəbəsinin bələdiyyə sədri İsa Yıldırımın azərbaycanlı milyarder Telman İsmayılova məxsus “Mardan Palace” otelində əcnəbi qadınlarla çəkilən fotoşəkilləri bomba effekti verib. Lent.az-ın məlumatına görə, Antalyadakı bir internet saytı vasitəsilə yayımlanan fotolarda Yıldırımın yanında poz verən qızların rus olduqları bildirilir.

Bələdiyyə sədri məhkəməyə müraciət edəcəyini bildirib: “Bir dostumun ad günündə mənim fotoaparatımla çəkilən şəkillər oğurlanıb. Məni şantaj etmək niyyətində olanlar istəklərinə cavab ala bilmədikdə bu fotoları mətbuata çıxararaq, kinlərini qusdular”.

Qeyd edək ki, MHP-çi bələdiyyə sədri Hollivud ulduzlarının da qatıldıqları “Mardan Palace”nin açılışına başı örtüklü həyat yoldaşı ilə birgə qatılıb. Ötən il bələdiyyə ilə “Mardan Palace” oteli arasında Aksu qəsəbəsinin bələdiyyəsi üçün xidməti binanın tikintisi haqqında müqavilə imzalanıb.